Labarai
NIAS Ta Karrama Namadi Bisa Bunƙasa Harkar Kiwo
Daga Usman Muhammad Zaria
Cibiyar Nazarin Kimiyyar Dabbobi ta Ƙasa (NIAS) ta karrama Gwamnan Jihar Jigawa, Malam Umar Namadi, da lambar yabo ta girmamawa ta musamman, bisa ƙoƙarin gwamnatinsa na bunƙasa harkar kiwo.
An miƙa masa lambar yabon ne yayin ziyarar ban girma da tawagar cibiyar, ƙarƙashin jagorancin shugabanta, Farfesa Suleiman Elias Bogoro, ta kai masa a gidan gwamnati da ke Dutse.
A cewar wata sanarwa da Babban Sakataren Yaɗa Labaran Gwamnan, Hamisu Mohammed Gumel, ya fitar, Farfesa Bogoro ya bayyana Jigawa a matsayin jiha abin koyi a ƙasar nan wajen bunƙasa harkar kiwo, bisa manufofi da zuba jari da gwamnatin ke yi.
Ya bayyana wasu daga cikin nasarorin gwamnatin, da suka haɗa da kafa ma’aikatar kula da harkokin kiwo, buɗe sashen nazarin kimiyyar dabbobi a Jami’ar Sule Lamido da kuma ɗaukar nauyin jami’an fasaha 16 zuwa ƙasar Indiya domin samun ƙarin horo na musamman.
Sauran ayyukan sun haɗa da yarjejeniyar zuba jarin dala miliyan 10 da kamfanin Srinivasa Farms domin bunƙasa kiwon kaji, tallafa wa zawarawa 2,350 ta hanyar shirin kiwon awaki da kuma aikin bunƙasa gonar ciyawar kiwo mai faɗin hekta dubu 100.
Farfesa Bogoro ya ce cibiyar NIAS a shirye take ta tallafa wa jihar a fannonin inganta abincin dabbobi, tantance ƙwararru, daidaita ma’auni da horas da ma’aikatan harkar kiwo.

A nasa jawabin, Gwamna Namadi ya gode wa cibiyar bisa karramawar, inda ya bayyana ta a matsayin ƙarfafa gwiwa wajen ci gaba da bunƙasa harkar kiwo. Ya ce shirin gwamnatin na da manufar inganta samar da abinci, samar da ayyukan yi, bunƙasa tattalin arziki da tabbatar da zaman lafiya.
Gwamnan ya tabbatar wa cibiyar cewa gwamnatinsa za ta ƙarfafa haɗin gwiwa da ita, tare da alƙawarin samar da fili domin gina ofishin NIAS a jihar. Ya kuma ce kasafin kuɗin shekarar 2027 zai tanadi makudan kuɗaɗe domin bunƙasa harkar kiwo.
Fassara: Safiyah Abdulkadir
-
Labarai5 days agoJigawa: Grand Khadi Ya Fara Rangadin Kotunan Shari’a
-
Labarai6 days agoGwamnatin Kebbi Ta Kammala Shirye-shiryen Tarbar Tinubu
-
Labarai4 days agoGobara Ta Lalata Shaguna 10 A Jihar Kwara
-
Labarai4 days agoShugaban Majalisar Kano Ya Ƙaddamar Da Sabon Ofishin ’Yan Sanda A Rogo
-
Labarai1 day agoINEC Ta Ƙaddamar Da Kwamitin Wayar Da Kai Ga Masu Zaɓe A Kaduna
-
Labarai5 days agoZa a Gabatarda Zaben Kananan Hukumomi a 2027 a Kaduna
-
Labarai2 days agoAn Bukaci Masu Kula da Lafiyar Al’umma Su Rike Ka’idojin Aiki
