Jirgin Sama Ya Zame Daga Kan Titinsa A Legas

Fasinjojin sun tsallake rijiya da baya, bayan jirgin saman da suka hau ya shige cikin jeji da su a Jihar Legas.

A yayin da ake ruwan sama ne wani jirgin fasinja  mallakin kamfanin Dana Air ya zame daga kan titinsa a filin jirgi na Murtala Muhammad da ke Legas, sannan ya ci kasa a cikin jeji.

Hakan ya sa fasinjojin ficewa cikin gaggawa don tsira da rayuwarsu da kuma guje wa abin da ka iya biyowa baya.

Bidiyon abin da ya faru da fasinjojin suka ɗauka bayan sun tsallake rijiya da baya ya nuna tayar gaban jirgin ta nutse a kasa a cikin ciyayi.

Zuwa lokacin hada wannan rahoti dai hukumomi ko kamfanin Dana Air ba su ce komai kan lamarin ba.

Haka zalika babu bayanin cewa wani ya  samu rauni ko kuma asarar rai ba.