Labarai

Gwamna Bago Ya Umurci SEMA Ta Gaggawata Kai Tallafi ga Wadanda Iftila’in Guguwa ya Shafa a Mokwa da Bida

Published

6 months ago

May 6, 2026

Daga Aliyu Lawal

Gwamnan Jihar Neja, Mohammed Umar Bago, ya jajanta wa al’ummar yankunan ƙananan hukumomin Bida da Mokwa kan mummunar guguwar iska da ta lalata gine-gine, ciki har da gidaje wuraren sana’o’i.

Wannan na ƙunshe ne cikin wata sanarwa da Babban Sakataren Yada Labarai na Gwamnan, Bologi Ibrahim, ya fitar a Minna, babban birnin jihar, ga manema labarai.

Gwamna Umar Bago ya bayyana lamarin a matsayin abin jimami da tashin hankali.

Ya kuma bayyana cewa iftila’in ya jefa waɗanda abin ya shafa cikin mawuyacin hali, yana mai jaddada musu cewa gwamnati za ta yi dukkanabin da ya dace don ganin ta saukaka musu halin da suka shiga.

Ya umarci Ma’aikatar Harkokin Jinƙai, da Hukumar Bayar da Agajin Gaggawa ta Jihar (SEMA), da sauran hukumomin da abin ya shafa da su ɗauki matakan gaggawa domin tallafa wa waɗanda iftila’in ya shafa.

Gwamna Umar Bago ya sake tabbatar da cewa gwamnatinsa za ta ci gaba da yin duk mai yiwuwa wajen inganta rayuwar al’umma.