NUPENG Ta Dakatar Da Yajin Aiki Bayan Kulla Yarjejeniya Da Dangote

Ƙungiyar Ma’aikatan Man Fetur da Gas ta Kasa (NUPENG), ta dakatar da yajin aikinta bayan kulla yarjejeniya da mahukunta matatar man fetur ta Dangote kan haƙƙin ma’aikata na shiga ƙungiyar kwadago.

NUPENG ta fara yajin aikin ne don nuna adawa da kin amincewar matatar Dangote kan shigar ma’aikatanta ƙungiyoyi.

An cimma matsayar ne bayan taron sulhu da aka gudanar a Abuja, wanda Ministan Kwadago da Ayyukan Yi, Mohammad Dingyadi, ya jagoranta, inda ɓangarorin biyu suka rattaba hannu kan Takardar Yarjejeniya.

Takardar yarjejeniyar ta samu sa hannun Darakta a matatar ta Dangote Sayyu Dantata, Shugaban NUPENG, Kwamared Akporeha Williams, da wasu shugabannin ƙungiyar.

A cikin yarjejeniyar, NUPENG ta amince da dakatar da yajin aikin nan take, domin buɗe hanya ga ci gaba da tattaunawa kan haƙƙoƙi da walwalar ma’aikata a matatar man fetur din ta Dangote.

RN