Za A Yi Jana’izar Tsohon Shugaban Kasa Muhammadu Buhari Ranar Talata A Garin Daura

Za a yi jana’izar tsohon shugaban ƙasa marigayi Muhammadu Buhari a garinsa na Daura da misalin ƙarfe biyu na rana gobe a Talata.

Gwamnan Jihar Katsina, Malam Dikko Radda ne ya sanar da hakan a Katsina yayin da yake yi wa manema labarai bayani game da shirye-shiryen jana’izar tsohon shugaban ƙasa.

Ya bayyana cewa an kammala shirye-shiryen ne bayan tattaunawa da iyalan marigayin da kuma abokansa na kusa.

Gwamnan ya ƙara da cewa za a iso da gawar tsohon shugaban ƙasa ne a gobe Talata daga birnin London zuwa Daura.

Ya miƙa ta’aziyyarsa ga iyalan Muhammadu Buhari, al’ummar Jihar Katsina da kuma sauran ‘yan Najeriya bisa rasuwar wannan dattijo, inda ya yi kira ga jama’a da su yi masa addu’a.

“Muna roƙon Allah Madaukakin Sarki Ya sada shi da rahamaSa, Ya sa Aljannatul Firdaus makomarsa. 

“Haka kuma muna miƙa ta’aziyyarmu ga shugaban ƙasa kuma babban kwamandan rundunonin tsaron ƙasa, Bola Ahmed Tinubu, bisa rasuwar wanda ya gada. Allah Ya ba mu ƙarfin ɗaukar wannan babban rashi,” in ji Gwamna.

Daga Isma’il Adamu