Shugaban Kasa Ya Jajanta wa Yan Kasuwar Da Gobara Ta Shafa A Abuja

Shugaba Bola Tinubu ya yi kira da a yi taka tsantsan tare da bin muhimman matakan tsaro don hana barkewar gobara da sauran hadurra.

Shugaban ya bayar da wannan shawarar ne a lokacin da yake jajanta wa ‘yan kasuwa a kasuwar Karu da ke cikin babban birnin tarayya wanda gobarar ta shafa.

Wata sanarwa da mai baiwa shugaban kasa shawara kan harkokin yada labarai Cif Ajuri Ngelale ya sanyawa hannu, ta ce shugaban kasar ya ba wa wadanda gobarar ta shafa tabbacin samun cikakken goyon bayan gwamnatinsa.

A yammacin ranar Alhamis ne gobara ta tashi a kasuwar inda ta lalata dukiya da sauran kayayyaki masu daraja.

Bello Wakili/Wababe