Za Mu Yaki Ayyukan Ta’addanci A Jihar Kano – Sabon Kwamishina

Kwamishinan ‘yan sanda na  Jihar Kano CP Salman Dogo Garba, ya fara sintiri a yankunan da ‘yan daba suka sake kunno kai a wasu sassan birnin Kano, tare da tabbatar wa mazauna yankunan kudurinsa na wanzar da zaman lafiya.

CP Dogo Garba ya nemi hadin kan shugabannin al’umma da jami’an ‘yan sanda na yanki (DPOs) don tsara dabarun yakar wannan barazana da kuma dawo da tsaro.

Ya jaddada cewa tsaro hakki ne ya rataya a wuyan kowa, don haka ya bukaci jama’a da su kai rahoton duk wata barazana da ka iya kunno kai ga ofishin ‘yan sanda mafi kusa da su ko kuma ta lambobin gaggawa.

CP ya ce ana ci gaba da gudanar da bincike kan abubuwan da suka faru a baya-bayan nan, kuma ana kokarin kamo masu aikata laifin da masu daukar nauyinsu.

Ya yaba da goyon bayan mazauna yankin masu son zaman lafiya, inda ya  bukaci a ci gaba da ba da hadin kai.

Abdullahi Jalaluddeen