Shugaba Tinubu ya Naɗa Farfesa Joash Ojo Amupitan a Matsayin Shugaban INEC

Majalisar magabata a Najeriya ta amince da nada Farfesa Joash Ojo Amupitan (SAN) daga jihar Kogi a matsayin sabon shugaban hukumar zaben kasar INEC.

Cikin wata sanarwa da fadar shugaban kasar ta fitar, ta ce Shugaba Tinubu ne ya gabatar da sunan Farfesa Amupitan ga majalisar domin neman amincewarta.

Tinubu ya shaida wa majalisar cewa Farfesa Amupitan ne mutum na farko daga jihar Kogi da zai rike mukamin, kuma ba dan siyasa ba ne.

Nan take kuma duka mambobin majalisar suka amince da shi ba tare da sabani ba.

A yanzu shugaba Tinubu zai aika sunansa zuwa majalisar dattawan Nigeria domin amincewarta kamar yadda kundin tsarin mulkin kasar ya tanada.

Farfesa Amupitan, mai shekara 58, malami ne a Jami’ar Jos da ke jihar Plateau.

A 2014 ne ya samu mukamin babban lauya na SAN.

Bello Wakili