Sarkin Musulmi Ya Ayyana Ranar Juma’a 1 ga Watan Shawwal

Daga Nasir Malali

Mai Martaba Sarkin Musulmi, Muhammad Sa’ad Abubakar, ya ayyana ranar Juma’a, 20 ga watan Maris a matsayin ranar 1 ga Shawwal na shekarar 1447 bayan hijira, wanda hakan ke nuna ƙarshen azumin Ramadan na wannan shekara.

A cikin wata sanarwa da shugaban Kwamitin Shawarwari kan Harkokin Addini na Majalisar Masarautar Sakkwato, Sambo Wali Junaidu ya sanya wa hannu, ya bayyana cewa Majalisar Masarautar tare da Kwamitin Duba Wata na Ƙasa ba su samu wani rahoto da ke tabbatar da ganin jinjirin watan Shawwal ba a yau Laraba, 18 ga watan Maris na 2026, wanda ya yi daidai da 29 ga watan Ramadan na shekarar 1447 bayan hijira.

Sanarwar ta ƙara da cewa ranar Juma’a, 20 ga watan Maris, wadda ta yi daidai da 1 ga Shawwal, ita ce ranar gudanar da Sallar Idi da kuma bikin Eid-el-Fitr.

Mai Martaba Sarkin Musulmin ya taya al’ummar Musulmin Najeriya murna, tare da fatan alkairi.