NSCDC Ta Kama Wani Mutum da Sayar da Gurbataccen Taki a Zamfara

Daga Aminu Dalhatu

Hukumar Tsaro da Kiyaye Haddura ta Kasa, NSCDC, reshen jihar Zamfara, ta gabatar da wani mutum mai shekaru 33 da haihuwa bisa zargin hannu a hada da rarraba gurbataccen takin zamani a jihar.

Jami’in Hulda da Jama’a na rundunar, ASC I Umar Mohammed Mansur, ne ya bayyana hakan yayin ganawa da manema labarai a hukumar ta NSCDC da ke Gusau, babban birnin jihar.

Mansur ya bayyana sunan wanda ake zargin da Mustafa Sani, wanda aka kama ranar 9 ga watan Mayun 2026, a unguwar Dallatu da ke Gusau.

Ya ce an kama wanda ake zargin ne tare da buhuna 550 na takin da ake zargin na gurbataccen taki ne, wadanda aka sanya a cikin buhunan bogi masu dauke da sunayen kamfanoni domin rarrabawa ga manoma da dillalai ba tare da sun sani ba.

A cewarsa, laifukan da ake zargin sun hada da hada baki wajen aikata laifi, hada da sayar da gurbatattun  kayayyaki, mallaka da amfani da buhunan taki na bogi, sanya bayanan karya, yaudara, da kuma niyyar damfarar jama’a.

Kakakin na NSCDC ya kara da cewa wanda ake zargin ya amsa cewa yana da hannu a wannan haramtacciyar sana’a, sannan ya ambaci wasu abokan aikinsa biyu da ya kira Alhaji Yusuf da Abdulrahman Ibrahim, wadanda har yanzu ake nema ruwa a jallo.

Umar Mansur ya bayyana cewa  yaduwar takin na jabu na kawo babbar barazana ga yawan amfanin gona da kuma tattalin arzikin manoma a jihar.

Ya sake jaddada kudirin rundunar karkashin jagorancin Babban Kwamandan NSCDC, Farfesa Ahmed Abubakar Audi, na ci gaba da yaki da zagon kasa ga tattalin arziki, damfara da sauran ayyukan ta’addanci a fadin kasa.

Kakakin ya kara da cewa rundunar jihar Zamfara karkashin jagorancin Kwamanda Sani Mustafa ta dauki matakan kariya domin dakile hada da rarraba kayan noma marasa inganci.

Ya kuma bukaci jama’a da su kasance masu sanya ido tare da kai rahoton duk wani abu da suke zargi ga hukumomin tsaro.