MaJalisar Kasa Za Ta hukunta Jami’an Gwamnatin Da Basa Karbar Gayyatar Ta

Majalisar wakilai za ta sanyawa Ministan Muhalli da Darakta Janar na Hukumar Ba da Agajin Gaggawa ta Kasa (NEMA) takunkumi idan har suka kasa amsa gayyatar kwamitinta kan muhalli a zama na gaba.

Takunkumin da aka shirya yi wa masu rike da mukaman gwamnati ya biyo bayan gazawar da suka yi wajen bayyanawa da kuma gabatar da jawabai game da batutuwan da suka shafi zaizayar guguwa, ambaliyar ruwa da kwararowar hamada a yawancin al’ummomi a fadin kasar.

Da yake jawabi shugaban kwamitin Mista Pondi Gbabojor, ya nuna rashin jin dadinsa da halinsu na minista da kuma shugaban hukumar NEMA inda ya jaddada cewa wannan ne karo na biyu da suke yin watsi da gayyatar tare da tabbatar da cewa ba za a sake amincewa da irin wannan hali ba.

Don haka shugaban kwamitin ya umurci magatakardar kwamitin da ya rubuta wa dukkansu biyun domin isar da damuwar kwamitin.

“Maladimi ya aika wasika ga ma’aikatar muhalli da NEMA tare da bayyana rashin jin dadin kwamitin domin wannan shi ne karo na biyu da ba su bayyana ba kamar yadda kwmaitin ya bukata”, inji shi.

Ya ce an shirya taron ne domin nemo hanyar da za a bi wajen magance illolin da zaizayar ke haifarwa a al’ummomi daga jihohin Anambra shida, Bayelsa, Delta, Legas, da Ondo da kwararowar hamada a Kano da ambaliyar ruwa a jihar Bauchi.

A jawabin da ya gabatar a gaban kwamitin babban daraktan hukumar kula da ganuwar koren itatuwa na kasa Dr Yusuf Maina Bukar, ya shaidawa kwamitin cewa kariya da dashen itatuwa akai-akai shi ne kadai mafita ga munanan yanayi na zaizayar kasa da kwararowar hamada a Najeriya.

Dokta Maina Bukar ya kuma tabbatar da cewa, wayar da kan al’umma kan muhimmancin dashen itatuwa da kuma hadarin sare bishiyu zai taimaka wajen habaka albarkatun makamashin al’umma.

Ya kuma ba da tabbacin hukumar ta kudiri aniyar kare busasshiyar kasa ta hanyar ajandar kawo sauyi na gwamnati mai ci a kan samar da abinci da habaka tattalin arziki.

COV: TSIBIRI/Wababe