Gwamnatin Kwara Ta Bada Tallafin Kayan Aikin Gona Ga Manoman Shinkafa

Akalla kungiyoyin manoman shinkafa talatin ne a karamar hukumar Edu ta jihar Kwara suka ci gajiyar shirin rabon kayan amfanin gona na gwamnatinjihar.

Kwamishinar noma da raya karkara ta jihar, Misis Oloruntoyosi Thomas ta bayyana haka a lokacin da take kula da rabon kayan amfanin gona ga kungiyoyi  manoma a kauyukan Yelwa, da Bacita.

Ta yabawa Gwamnan jihar bisa namijin kokarin da ya yi na ganin an samu wadatar abinci a jihar.

Misis Thomas ta bayyana farin cikinta kan yadda aka samu nasarar rarraba kayayyakin a yankin.

Kwamishinar ta shawarci manoman da suka amfana da su tabbatar da yin amfani da kayan aikin gonan yadda ya kamata.

A nasa jawabin a madadin wadanda suka ci gajiyar tallafin, Shugaban kungiyar manoma ta Najeriya (AFAN) reshen jihar Kwara, Umar Mahmud-Aboki ya yabawa gwamnatin jihar kan yadda ta kai dauki ga manoma.

Tun da farko a nasa jawabin Etsu Tsaragi, Alhaji Aliyu Abdullahi wanda Santuraki na Tsaragi ya wakilta, Alhaji Jubril Gana -Jubril ya godewa gwamnatin jihar bisa aiwatar da shirin inganta rayuwar manoma.

Ali Muhammad Rabi’u