Gwamna Sule ya rattaba hannu kan kasafin kudin shekarar 2025

Gwamna Abdullahi Sule na jihar nasarawa, ya rattaba hannu a kan kasafin kudi na naira biliyan 384.3.

Gwamnan yayin da yake gabatar da kasafin kudin a gidan gwamnati, ya bada tabbacin cewa gwamnatin sa ba za ta yi kasa a gwiwa ba wajen ganin kasafin ya yi yadda ya kamata.

Gwamna Abdullahi Sule ya kuma tabbatar da aniyarsa na ganin an aiwatar da tanade-tanaden kasafin kudin yadda ya kamata tare da jaddada muhimmancin samar da ingantaccen kasafin kudi wanda zai dace da abin da ake tsammani a duniya.

Ya kuma yabawa kakakin majalisar da ‘yan majalisar jiha da kwamishinoni da jami’an ma’aikatar kudi ta jiha bisa yadda suka bayar da kyakkyawar gudunmawa kan kasafin kudin.

A nasa bangaren, kakakin majalisar dokokin jihar nasarawa, Mista Danladi Jatau ya ce kudurin ya bi dokokin da suka dace kafin ya zama doka.

Ya kuma yabawa ’yan majalisa na 7 a karkashin jagorancinsa bisa jajircewarsu wajen gudanar da ayyuka.

COV/Aliyu Muraki/Lafia. Wababe