Dan Takarar Gwamnan Sokoto Na ADC Ya Tsalleke Rijiya da Baya Daga Yunkurin Hallaka Shi

Daga Nasiru Muhammad, Sakkwato

Dan takarar gwamnan Jihar Sokoto na jam’iyyar  ADC, Hon Mannir Muhammad Dan’Iya, ya zargi jami’an rundunar tsaron da gwamnatin jihar ta kafa da kai hari kan ayarin motocinsa.

Da yake zantawa da manema labarai a Sokoto, dan takarar ya ce lamarin ya faru ne a lokacin da yake dawowa daga raka Sanata Aminu Waziri Tambuwal zuwa filin jirgin sama domin komawarsa Abuja, bayan wasu harkokin siyasa da ya gudanar a Sokoto.

Dan’Iya ya ce harin ya faru ne a yankin filin jirgin saman Sokoto da misalin ƙarfe 9 na daren Juma’a, 30 ga Oktoba, 2026.

Da yake bayanin yadda lamarin ya faru, Dan’Iya ya ce jami’an rundunonin tsaron jihar guda biyu sun tare ayarin motocinsa, tare da hana su wucewa, suna masu cewa umarni daga sama aka ba su na kada su bari mambobin ADC su shiga Sokoto.

Ya bayyana cewa ƙoƙarin jami’an tsaron da ke tare da shi na sasanta lamarin bai yi nasara ba, domin an harba bindigogi kan motarsa, sannan aka tsare jami’an Hukumar Tsaro ta Farin Kaya (DSS) guda biyu da ke cikin tawagar tsaronsa.

Dan’Iya ya tabbatar da cewa da kansa ya kai ƙorafi ga Kwamishinan ’Yan Sandan Jihar Sokoto, inda ya bayyana masa yadda lamarin ya faru tare da neman a yi masa adalci.

Yana mai cewa lamarin barazana ce kai tsaye ga rayuwarsa, duk da cewa ya kuɓuta ba tare da rauni ba, Dan’Iya ya buƙaci hukumomin da abin ya shafa su gudanar da bincike cikin gaggawa kuma cikin ’yanci ba tare da nuna son kai ba.

Ya kuma buƙaci a adana tare da bincikar dukkan hujjojin da ake da su, ciki har da faifan bidiyo, bayanan ayyukan jami’an tsaro, shaidun waɗanda suka ga abin da ya faru da kuma duk wani rahoto da ya shafi amfani da makamai.

Ya yi kira ga Kwamishinan ’Yan Sanda, Sufeto-Janar na ’Yan Sanda, Darakta-Janar na DSS da sauran hukumomin da abin ya shafa da su gudanar da bincike nan take tare da gano waɗanda suka bayar da umarnin, tantance jami’an da suka aikata ba daidai ba, tare da tabbatar da sakin jami’an DSS guda biyu cikin gaggawa idan har yanzu suna tsare.

Fassara: Shafii Abubakar Wababe