Sojojin Nijeriya Sun Kashe ‘Yan Ta’adda A Kaduna

Dakarun Sojin Najeriya Sun Kashe Mahara Bakwai Tare Da Kame Makamai Da Babura A Jihar Kaduna.

Dakarun runduna ta daya ta sojojin Najeriya da aka girke a wani shingen a Udawa sun gudanar da sintiri na yaki a hanyar Udawa zuwa Kurebe a karamar hukumar Birnin Gwari ta jihar Kaduna a ranar 19 ga watan Mayu.

A wata sanarwa da mukaddashin daraktan hulda da jama’a na rundunar soji ta daya ta Kaduna, Laftanal Kanal Musa Yahaya ya fitar, ya ce a lokacin da suke sintiri da sojoji sun yi gaba da gaba da ‘yan ta’addan inda suka yi nasarar kashe ‘yan ta’adda biyar.

Hakazalika, dakarun rundunar da aka tura a Sabon Birni a karamar hukumar Igabi, sun tare wasu da ake zargin ‘yan ta’adda ne a yankin Baka, inda suka yi ta harbe harbe da bindiga mai karfin gaske, inda suka gudu zuwa tsaunin da ke kusa da su dauke da raunukan harbin bindiga da dama.

Haka kuma, a lokacin da suke kwanto a kauyen Kwaga da ke karamar hukumar Birnin Gwari, sojojin sun kashe ‘yan ta’addan biyu daga cikinsu.

Wasu kayayyakin da aka kwato a ayyukan sun hada da bindiga guda daya, harsashi shida,  bindiga kirar AK 47 daya, babura biyu, da dai sauransu.

A cewar sanarwar, babban kwamandan runduna ta daya kuma kwamandan Operation WHIRL PUNCH, Manjo Janar Landers Saraso, ya yabawa sojojin bisa yadda suka yi tsayin daka kuma ya umurce su da su ci gaba da wannan namijin kokari don kakkabe ‘yan ta’adda daga kasan nan.

Hakazalika ya kuma yi kira ga duk ‘yan kasa masu bin doka da oda da su kai rahoton mutanen da aka gani da raunukan harbin bindiga suna neman kulawa ga rundunar sojojin Najeriya ko kuma hukumomin tsaro mafi kusa.

Sanarwar ta yi kira ga al’ummar jihohin Kaduna da Neja da su baiwa rundunar soji da sauran jami’an tsaro damar samun bayanan sirri a kan lokaci da kuma matakan da suka dace domin daukar matakin gaggawa.

PR/Usman Sani/Wababe