Rukunin Farko na Maniyyatan Jihar Jigawa Ya Tashi Zuwa Kasar Saudiyya

Rukunin farko na maniyyata 480 daga Jihar Jigawa ya tashi daga Filin Jirgin Sama na Nuhu Muhammadu Sunusi da ke Dutse zuwa birnin Madina na kasar Saudiyya domin aikin Hajjin 2026.

Babban Daraktan Hukumar Jin Dadin Alhazai ta jihar, Alhaji Ahmed Umar Labbo, ya bayyana hakan ga Rediyon Najeriya jim kaɗan bayan tashin jirgin nasu zuwa ƙasar mai tsarki.

Ya bayyana cewa maniyyatan sun fito ne daga ƙananan hukumomi 25 na jihar.

Ya ce ƙananan hukumomin sun haɗa da Kazaure, Roni, Gwiwa, Yankwashi, Gumel, Gagarawa, Garki, Maigatari, Suletankarkar, Babura, Jahun, da Miga.

Sauran sun haɗa da Kafin Hausa, Auyo, Hadejia, Kirikasamma, Guri, Birniwa, Malam Madori, Dutse, Kiyawa, Ringim da Gwaram.

Alhaji Ahmed Umar Labbo ya bayyana cewa jirgin ya kuma ƙunshi wasu jami’an hukumar jin daɗin alhazai ta jihar, ma’aikatan lafiya da sauran muhimman masu ruwa da tsaki.

Ya buƙaci maniyyatan da su zama jakadu nagari ga jihar da ƙasa baki ɗaya yayin zamansu a ƙasa mai tsarki.

Labbo ya yaba wa hukumomin tsaro na jihar bisa gudanar da tantancewar maniyyata cikin sauƙi a sansaninsu da kuma a filin jirgin sama.

Haka kuma ya yaba wa Gwamnan Jihar, Malam Umar Namadi, bisa goyon baya da haɗin kai da yake bai wa hukumar a kowane lokaci.

Ya bayyana cewa jihar ta ƙarfafa maniyyatanta ta hanyar gayyatar hukumomin gwamnatin tarayya da suka haɗa da ‘Yan Sanda, Hukumar Yaki da Sha da Fataucin Miyagun Kwayoyi (NDLEA), Hukumar Shige da Fice da kuma Kwastam, domin wayar da kan maniyyata kan abubuwan da za a iya ɗauka da kuma abubuwan da aka haramta.

Ahmed Labbo ya yi kira gare su da su ji tsoron Allah a dukkan ayyukansu yayin zamansu a ƙasa mai tsarki.

Ya ƙara da cewa jihar ta shirya komai don tabbatar da jin daɗinsu da walwalarsu a Masarautar Saudi Arabia.Wasu daga cikin maniyyatan da suka yi magana da Rediyon Najeriya kafin tafiyarsu sun yaba wa gwamnatin jihar da hukumar Hajji bisa kyakkyawar kulawa da suka samu a sansanin Hajji da kuma a filin jirgin sama.

Rahoton wakilinmu ya nuna cewa jirgin kamfanin Umza Airline ne ya ɗauki maniyyatan.