Malaman Jami’ar Kwara Sun Yi Zanga-Zangar Lumana

Kungiyar Malaman Jami’o’i ta Najeriya (ASUU), reshen Jami’ar Jihar Kwara da ke Malete (KWASU), ta gudanar da zanga-zangar lumana a ranar Laraba domin neman a biya su kudaden alawus-alawus na EAA da  sauran hakkokinsu.

Malaman a karkashin inuwar ASUU sun ce sun shiga sahun sauran rassan kungiyar a fadin ƙasa wajen matsa lamba kan gwamnatin tarayya da ta aiwatar da yarjejeniyar da aka cimma tsakaninta da ASUU tun shekarar 2009.

Shugaban  ASUU reshen KWASU, ya bayyana cewa jinkirin biyan EAA da sauran hakkoki ya sanya malamai cikin mawuyacin hali, inda da yawa daga cikinsu ke fama da matsalolin tattalin arziki.

Ya ce duk da ƙalubalen da suke fuskanta, malamai na ci gaba da gudanar da ayyukansu na koyarwa da bincike, sai dai yanzu tura ta kai bango.

“Mun fito ne domin nuna damuwarmu da kuma jawo hankalin gwamnati. Babu shakka, ci gaban ilimi ba zai yiwu ba idan malamai ba su samu kulawa da gata ba,” In ji shi.

Kungiyar ta kuma yi kira ga Gwamnan Jihar Kwara da ya yi wajen ganin an warware matsalar cikin gaggawa.

ASUU ta yi gargadin cewa, idan aka ci gaba da watsi da bukatunsu, ba za su yi jinkiri ba wajen ɗaukar matakan da suka fi wannan tsauri a nan gaba.

Ta yi kira ga ɗalibai, iyaye da sauran jama’a da su fahimci matsayin da suke ciki, tare da goya musu baya wajen kare martabar ilimi da neman hakkinsu.

Ali Muhammad Rabi’u