Kungiyar Nawoj Reshen Kano Na Neman Goyon Bayan Gwamnati

Kungiyar mata ‘yan jarida ta Najeriya (NAWOJ) reshen jihar Kano, ta yi alkawarin hada kai da gwamnatin jihar Kano domin horar da mambobinta da taimakawa wajen yada bayanai kan ayyukan gwamnati.

An yi wannan alkawari ne a wata ziyarar fahimtar da NAWOJ ta kai wa sabon kwamishinan yada labarai na jihar Kano, Kwamared Ibrahim Abdullahi Waiya.

Shugabar kungiyar ta NAWOJ reshen Kano, Kwamared Bahijja Kabara, ta yabawa kwamishinan bisa jajircewarsa na inganta ayyukan mata ‘yan jarida ta hanyar horas da su.

Ta kuma jaddada cewa irin wannan kokarin zai inganta kwarewa da ingancin aikin jarida a jihar.

Kwamishinan yada labarai, Kwamared Ibrahim Abdullahi Waiya, ya nuna jin dadinsa ga NAWOJ bisa ziyarar da suka kai tare da bada tabbacin kungiyar na ci gaba da marawa gwamnati baya.

Ya amince da muhimmiyar rawar da mata ‘yan jarida ke takawa wajen yada labarai kuma ya yi alkawarin ba da fifikon karfafa su ta hanyar horar da su da kuma shirye-shirye masu inganci.

Sakatariyar kungiyar NAWOJ ta kasa, Kwamared Wasila Ibrahim Aladan, ta bayyana mahimmancin hadin kai tsakanin kafafen yada labarai da gwamnati wajen tabbatar da ingantaccen sadarwa da wayar da kan jama’a.

A nata jawabai Hajiya Salma Yusuf wadda ta nuna godiya ga Gwamna Alhaji Abba Kabir Yusuf bisa goyon bayan da yake bai wa mata, inda ta bayyana shi a matsayin mai fafutukar karfafa gwiwar mata.

Ta kuma yabawa Kwamared Waiya bisa yadda yake samar da tsare-tsare masu dacewa da kafafen yada labarai da inganta hadin gwiwa da masu ruwa da tsaki.

Wannan ziyarar ta nuna jajircewar NAWOJ wajen ciyar da aikin jarida gaba, karfafawa mata gwiwa, da tallafawa shirye-shiryen gwamnati da ke da nufin ci gaban al’umma.

KHADIJAH ALIYU/Wababe