Jirgin Farko Na Alhazan Jihar Kano Ya Isa Kasa Mai Tsarki

Gwamna Abba Kabir Yusuf na Jihar Kano ya kaddamar da jirgin farko na maniyyata aikin hajjin bana a jihar.

Da yake jawabi yayin kaddamarwar, Gwamna Abba Kabir  ya bukaci maniyyatan da su kasance jakadu nagari tare da yin addu’a ga jihar da  Najeriya  baki daya.

Jirgin na farko na mahajjatan  Kano ya tashi ne daidai da karfe goma sha daya da minti arba’in da daya na safiyar yau dauke da  jimillar mutane 578, a jirgin sama na Max Air B747  inda suka nufi filin jirgin sama na Sarki Abdul-Aziz da ke Jiddah.

Darakta Janar na Hukumar Jin Dadin Alhazai ta Jihar Kano, Alhaji Lamin Rabi’u Danbappa ya ce mahajjatan da ke  jirgin farkon sun fito ne daga kananan hukumomi hudu na jihar.

A cewarsa, karamar hukumar Gwale na da mahajjata 175, yayin da karamar hukumar Dala ke da alhazai 119, sai  karamar hukumar Ungogo tana da alhazai 106, ita kuma karamar hukumar Fagge na da mahajjata 135.

Ya kuma nuna jin jinjinawa Gwamna bisa karamcin da ya yi wa Alhazai da suka hada da tallafin kudin Hajji na Naira 500,000 kowanne, da karin kudin guzuri da ya kai sama da Naira miliyan 367, da karin Riyal 100  da aka bai wa dukkan maniyyatan.

Abdullahi Jalaluddeen