Gwamna Namadi Ya Bada Goron Sallah Ga Alhazan Jihar Jigawa

Gwamna Umar Namadi na Jihar Jigawa ya bada Riyal 100  a matsayin goron Sallah ga  mahajjata jihar su  1,298.

Amirul Hajj na jihar kuma mai martaba Sarkin Hadejia Dr. Adamu Abubakar Make ya bayyana haka a lokacin da ya ziyarci masaukin Alhazai a Makkah.

Sarkin ya bayyana cewa, an dauki matakin ne don rage wahalhalun da Alhazai suka fuskanta a sakamakon dala 400 da aka ba su ta kudin guzuri saboda matsalar tashin Dala.

Ya yi kira ga maniyyatan da su yi addu’o’in samun zaman lafiya da kwanciyar hankali a jihar da kasa baki daya.

Dakta Adamu Abubakar Maje ya kuma yabawa dan jaridan nan na tawagar manema labarai ta jihar, Alhaji Abba Sa’idu Limawa wanda ya tsinci kudaden kasashen waje a Madina kuma ya mayar da ga  hukumar Alhazai ta kasa NAHCON,  ta hannun hukumar alhazai ta jihar Jigawa.

Shi ma da yake nasa jawabin babban daraktan hukumar Alhaji Ahmed Umar Labbo ya yabawa mahajjatan bisa bin ka’idojin da aka gindaya na masarautar Saudiyya.

Ya yi kira ga maniyyatan da kada su wuce nauyin kilogiram  8 a jakar su ta   hannu da kuma kilogiram 32 a babbar jaka.

Wasu daga cikin Alhazan da suka zanta da gidan rediyon Najeriya sun godewa Gwamna Namadi bisa wannan karamci da aka yi musu, sannan sun yi alkawarin ci gaba da zama jakadu nagari ga jihar yayin da suke kasa mai tsarki.

A baya dai Gwamna Namadi ya biya Naira miliyan daya ga kowane maniyyacin aikin Hajjin 2024.

Rediyon Najeriya ya ruwaito cewa,  tawagar gwamnatin da ta raka Amirul Hajj ya hada da mataimakin kakakin majalisar jiha, shugaban kwamitin majalisar kan aikin hajji da dai sauransu.

Usman Muhammad Zaria