Babban Layin Lantarki Na Kasan Nan Ya Sake Lalacewa

An sake fuskantar katsewar wutar lantarki sakamakon lalacewar babban layin lantarki na ƙasar nan a ranar Alhamis.

Layin ya lalace ne da misalin ƙarfe 4:30 na yamma, inda ya jefa miliyoyin ‘yan ƙasar da kuma sana’o’insu cikin duhu.

Wannan ne karo na huɗu da ake samun irin wannan matsalar a shekarar 2024.

Tuni kamfanonin samar da lantarki suka nemi afuwar kwastomominsu tare da sanar da su cewa “waɗanda abin ya shafa suna bakin ƙoƙarinsu wajen ganin an shawo kan matsalar”.

Ya zuwa ƙarfe 4:00 na yammacin Alhamis ɗin, kasar ta samar da lantarki mai yawan megawatts 2,984 ne kacal cikin kusan 8,000 da take iya tattarawa.