Ana Aikin Hadin Gwiwa Don Kawo Karshen Cutukan HIV/AIDS Da Tarin Fuka

Domin karfafa tsarin kiwon lafiya ta hanyar sa ido a tsakanin al’umma, kungiyar bayar da shawarwari ta COVID-19 (C19RM) ta jihar Kano ta kai ziyarar bayar da shawarwari ga Hukumar Yaki da Cutar Kanjamau ta Jihar Kano (SACA).

Ziyarar dai an yi ta ne da nufin sabunta ayukkan hukumar game da ci gaba da ziyarar wuraren da kungiyar C19RM Advocacy, Treatment, and Monitoring (ATM) ke aiwatarwa a karkashin sashin al’umma ta ACOMIN.

Tawagar ta hada da Abdulhakim Daiyab (Jami’in shirye-shirye na jihar C19RM), Dakta Nura Haladu (Shugaban ACOMIN na Jiha), Alhaji Sunusi Hashim (Shugaban kungiyar TB ta jiha), da Hafsat Muhammad (wakiliyar NEPHWAN).

Tawagar ta samu tarbar Dr Imam Wada, Daraktan Rigakafi da Kulawa, wanda ya wakilci Darakta Janar na SACA, Dakta Usman Bashir.

A yayin ziyarar, tawagar ta bayyana cewa, C19RM ATM ya dade yana ba da himma don inganta yaki kan cutar kanjamau, tarin fuka a matakan cibiyoyin kiwon lafiya kafin a kai ga magance matsalolin da ba a warware ba ga hukumomin da abin ya shafa.

Sun bayyana sakamakon binciken da suka yi a kwanan nan, wanda ya bayyana kalubalen da ke buƙatar sa baki cikin gaggawa don inganta aikin ba da kulawa na kiwon lafiya da kuma martanin da ya shafi al’umma dangane da cutar kanjamau.

Tawagar ta bayyana cewa, bayan ziyarar wuraren aiki, suna ba da ra’ayi ga ƙungiyoyin jama’a na CBOs da ƙungiyoyin sa ido na al’umma CLMTs.

Da yake mayar da jawabi, Dr. Imam Wada ya amince da kimar shirin na C19RM kuma ya tabbatar da shirin SACA na magance matsalolin da aka taso.

Ya jaddada kudirin hukumar na yaki da cutar kanjamau tare da jaddada cewa gwamnatin jihar Kano karkashin jagorancin Gwamna Alhaji Abba Kabir Yusuf ta kuduri aniyar tabbatar da samar da ingantaccen kiwon lafiya ga kowa da kowa.

Ya kuma yaba da gudunmawar da tawagar C19RM ke bayarwa a duk fadin kananan hukumomin jihar Kano tare da ba su tabbacin ci gaba da haɗin gwiwa don cimma burin lafiya.

KHADIJAH ALIYU/KANO