Labarai

Jihar Naija Ta Dauki Matakan Gaggawa Sakamakon Bullar Cutar Ebola A Abuja

Published

1 day ago

October 21, 2026

Daga Aliyu Lawal

Ma’aikatar Lafiya ta Jihar Nijar ta sanya Cibiyar Ayyukan Gaggawa ta Lafiyar Jama’a (PHEOC) cikin shirin ko-ta-kwana, biyo bayan tabbatar da bullar cutar Ebola a Babban Birnin Tarayya Abuja.

Kwamishinan Lafiya na jihar, Dakta Murtala Muhammad Bagana ne ya bayyana hakan a cikin wata sanarwa da aka fitar a Minna, inda ya ce matakan da jihar ta ɗauka na rigakafi ne, domin ƙarfafa sa-ido, gano masu ɗauke da cutar da wuri, da kuma ɗaukar matakan gaggawa idan an samu wanda ake zargi da kamuwa da ita.

Dakta Bagana ya tabbatar wa al’ummar jihar cewa har yanzu ba a gano ko da mutum ɗaya da ya kamu da cutar Ebola a Jihar Nijar ba.

Wannan mataki ya biyo bayan sanarwar da Gwamnatin Tarayya ta fitar a ranar Talata, 20 ga Oktoban 2026, inda ta tabbatar da samun wacce ta kamu da cutar Ebola, wadda ta shigo Najeriya daga Uganda. A halin yanzu, an keɓe ta, inda take samun kulawar jinya, yayin da hukumomin lafiya ke sa-ido kan mutane 44 da aka gano sun yi mu’amala ta kusa da shi.

Kwamishinan ya ce yawan zirga-zirgar mutane da harkokin kasuwanci tsakanin Jihar Nijar da Babban Birnin Tarayya Abuja ya sa ya zama wajibi jihar ta ƙara tsaurara matakan sa-ido da shirin ko-ta-kwana.

Ya ƙara da cewa ma’aikatar na aiki tare da Cibiyar Kula da Cututtuka Masu Yaɗuwa ta Najeriya (NCDC), Hukumar Lafiya ta Duniya (WHO) da sauran abokan hulɗa na ƙasa da ƙasa domin tabbatar da shirye-shiryen tunkarar cutar a faɗin jihar.

Dakta Bagana ya ce an umurci dukkan cibiyoyin kiwon lafiya na gwamnati da masu zaman kansu a Jihar Nijar da su gaggauta kai rahoton duk wanda ake zargin ya kamu da cutar Ebola domin a gudanar da bincike tare da ɗaukar matakan da suka dace.

Ma’aikatar ta fitar da lambobin wayar gaggawa da za a kira domin kai rahoton waɗanda ake zargin sun kamu da cutar kamar haka: Daraktan Kiwon Lafiyar Jama’a, 0703 458 3079; Masanin Cutar Annoba na Jiha, 0807 721 3070; Jami’in Sa-Ido da Sanar da Cututtuka na Jiha (DSNO), 0807 529 1989; da kuma layin kyauta na NCDC na ƙasa, 6232.