NSCDC Ta Kama Wanda Ake Zargi Da Safarar Mutane A Zamfara

Daga Aminu Zamfara

Hukumar Tsaro ta NSCDC ta Jihar Zamfara ta kama wani mutum mai shekaru 25, mai suna Bala Abubakar, bisa zargin safarar mutane da tilasta wa yara ƙwadago a Gusau, babban birnin jihar.

Shugaban Sashen Hulɗa da Jama’a na hukumar, ASCI Umar Mohammad ne ya bayyana hakan yayin da yake gabatar da wanda ake zargin a Gusau, a madadin Kwamandan hukumar na jihar, Sani Mustapha.

Ya ce jami’an NSCDC sun tare wanda ake zargin a yankin Lalan da ke Gusau da misalin ƙarfe takwas da rabi na dare, ranar 15 ga watan Oktoban 2026, inda suka ceto wasu ’yan mata biyu masu shekaru 13.

’Yan matan da aka ceto, Amira Baje Ibrahim da Haulatu Shaibu, dukkaninsu ’yan asalin ƙaramar hukumar Zurmi ne da ke Jihar Zamfara.

 A cewar Umar Mohammad, binciken farko ya nuna cewa ana zargin ana safarar ’yan matan ne daga ƙaramar hukumar Shinkafi, domin miƙa su ga wasu mutane biyu da aka bayyana sunayensu da Hadiza da Bara’atu a Suleja, Jihar Neja.

Bayan wannan samame, Kwamandan NSCDC na jihar, Sani Mustapha, ya bayar da umarnin miƙa lamarin ga Hukumar Yaƙi da Safarar Mutane ta Ƙasa (NAPTIP) domin gudanar da ƙarin bincike da ɗaukar matakan shari’a da suka dace.

Kakakin hukumar ya sake jaddada matsayar NSCDC ta rashin amincewa da aikata laifuka, tilasta wa yara ƙwadago da take haƙƙin ɗan Adam, yana mai cewa za a gurfanar da waɗanda ake zargi a gaban kotu idan bincike ya tabbatar da hujjojin da suka dace.

Ya kuma buƙaci al’umma da su kasance masu lura da abubuwan da ke faruwa, tare da kai rahoton duk wani abu da suke zargi ga hukumomin tsaro, domin taimakawa wajen yaƙi da safarar mutane da kuma kare yara masu rauni.

Fassara: Safiyah Abdulkadir