Zargin Juyin Mulki: Wata Ƙungiya Ta Bukaci Sakin Jami’an Soja da Aka Tsare Saboda Matsalolin Lafiya

Wata ƙungiya mai taken Concerned Pro-Democratic Activists of Nigeria ta yi kira ga Gwamnatin Tarayya da ta saki jami’an sojan da ke tsare bisa zargin hannu a wani yunkurin juyin mulki a Oktoban shekarar da ta gabata, har zuwa kammala binciken da ake yi kan lamarin.

Shugaban ƙungiyar, Comrade Yusuf Musa Dauda, ne ya bayyana wannan kira yayin taron manema labarai da aka gudanar a Lafia, babban birnin Jihar Nasarawa.

Ya bayyana damuwa kan yadda wasu daga cikin jami’an da aka kama tun watan Oktoba ke tsananin rashin lafiya a yayin tsare su, ba tare da samun ingantaccen kulawar lafiya ba.

Comrade Yusuf Musa Dauda ya kuma nuna rashin jin daɗinsa kan hana iyalan jami’an damar ganinsu ko tattaunawa da su tun bayan kamunsu, ko aƙalla su san halin da suke ciki domin rage musu fargaba.

Ƙungiyar ta kuma yi Allah-wadai da tsawaita tsare jami’an sojan ba tare da gurfanar da su gaban kotu ko bin ka’idojin doka ba, a wani lokaci da ake ikirarin mulkin dimokiraɗiyya, inda ta roƙi Shugaba Bola Ahmed Tinubu da ya shiga tsakani domin duba lamarin tare da sakin su idan babu tuhuma tabbatacciya a kansu.

A cewarsa:

“Hedikwatar Tsaron Ƙasa ta Najeriya, ta hannun tsohon Daraktan Yaɗa Labarai na Tsaro, Birgediya Janar Tukur Gusau, a ranar 4 ga Oktoba, 2025, ta sanar da kama wasu jami’an soja bisa zargin rashin da’a da karya ƙa’idojin aiki.

“Sojoji sun ce bincike ya nuna cewa korafe-korafen jami’an da aka kama na da alaƙa da yawan faduwa jarabawar ƙarin matsayi da kuma jin cewa aikinsu ya tsaya cak.

“Bayan wasu makwanni, jita-jita ta bazu cewa an kama su ne bisa zargin shirin juyin mulki, amma sojoji da gwamnati sun gaggauta musanta hakan.

“Duk da cewa muna yin Allah-wadai da duk wani yunƙurin kifar da gwamnati ta hanyar da ba ta dimokiraɗiyya ba, muna kira ga jama’a da kuma roƙon hukumomin da abin ya shafa da su yi adalci wajen duba wannan batu.

“Saboda haka, muna roƙon Gwamnatin Tarayya, Shugaban Ƙasarmu mai jin tausayin al’ummarsa, da sauran hukumomin da abin ya shafa da su ba jami’an kulawar lafiya da ta dace.”

Ya kuma ƙara da kira ga Gwamnatin Tarayya da ta ba da izinin jami’an da ke tsare su rika tuntuɓar iyalansu, domin rage musu damuwa da tabbatar da lafiyarsu da tsaronsu.

COV / Aliyu Muraki / Lafia