Shugaban Kasa Ya Bar Japan zuwa Brazil

Shugaba Bola Ahmed Tinubu ya bar Yokohama na kasar Japan zuwa kasar Brazil, inda zai fara ziyarar aiki a ranar 24 ga watan Agusta.

Mai ba shugaban kasa shawara na musamman kan yada labarai da dabaru, Bayo Onanuga, ya tabbatar da haka a cikin wata sanarwa a ranar Alhamis, inda ya ce shugaban zai yada lango a Los Angeles kafin ya ci gaba da tafiya zuwa Brasilia, babban birnin Brazil.

Shugaban ya fara ziyarar kasashen biyu ne a ranar 15 ga watan Agusta lokacin da ya bar Abuja. Tawagar tasa ta yi zango a birnin Dubai na kasar Hadaddiyar Daular Larabawa, kafin ta isa Yokohama da safiyar ranar 18 ga watan Agusta.

A yayin da yake kasar Japan, shugaba Tinubu ya halarci bikin bude taro da cikakken taron kasa da kasa kan ci gaban Afirka (TICAD) na Tokyo karo na tara a ranar 20 ga watan Agusta. Ya kuma gudanar da wasu tarurrukan kasashen biyu, wanda ya kammala tare da ganawa da ‘yan Najeriya mazauna kasashen waje a daren ranar Alhamis.

Bello Wakili