NSAP ta haɗa kai da Sojoji domin magance rikicin manoma da makiyaya a Najeriya

Ƙungiyar Sarrafa dabbobi ta kasa ta bayyana cewa haɗin gwiwa da rundunar sojin Najeriya na da muhimmiyar rawa wajen magance matsalolin da suka haɗa da matsin lamba kan tsarin samar da abinci, ƙaruwar rashin tsaro a yankunan karkara, da kuma rikice-rikicen manoma da makiyaya da ke shafar kiwon dabbobi a ƙasar.

Shugaban ƙungiyar, Farfesa Olaniyi Babayemi, ne ya bayyana haka yayin wani taron manema labarai a gabanin taron shekara-shekara na 51 na NSAP da aka gudanar a Kaduna.

Farfesa Babayemi ya bayyana cewa an kafa NSAP tun a shekarar 1973 da nufin inganta kiwon dabbobi, ƙarfafa tsarin abinci, da tallafawa ci gaban ƙasa ta hanyar hanyoyin kimiyya.

Ya ce rundunar soji, ta hanyar kasancewarta a yankuna daban-daban, tare da ƙarfin jigila da tattara bayanan tsaro, za ta iya taimakawa wajen kare hanyoyin kiwo, kare al’ummomin karkara, da kuma tallafa wa tsarin kiwo na zamani.

Ya jaddada cewa wannan haɗin gwiwa ba nufin soja zai mamaye harkar noma ba ne, illa samar da yanayi mai aminci da zai bai wa noma da kiwo damar bunƙasa.

A cewarsa, ci gaban kiwon dabbobi mai ɗorewa a Najeriya na dogara ne da zaman lafiya tsakanin makiyaya da manoma.

Ya ƙara da cewa, “Hanya mafi dacewa ita ce rungumar tsarin zamani kamar kiwon dabbobi a gona (ranching), sarrafa kiwo, da inganta abinci ga dabbobi. Waɗannan matakai na rage rikici tare da ƙara yawan amfanin gona da dabbobi.”

Shugaban ya kuma yi kira ga al’ummomin noma da kiwo a faɗin ƙasar da su zauna lafiya da juna.

Ya ce: “Ci gaban noma da zaman lafiya dole ne su tafiya tare. Ba za mu iya samun tsaro mai ɗorewa ba idan babu zaman lafiya a matakin al’umma.”

Farfesa Babayemi ya ce taron na nufin fito da shawarwari masu amfani da za su taimaka wajen inganta kiwon dabbobi, rage rikice-rikice, da ƙarfafa zaman lafiya a ƙasa.

A nasa jawabin, Shugaban Kwamitin Shirya Taron, Farfesa Philip Anthony Vantsawa, ya ce wannan shi ne karo na farko cikin fiye da shekaru 50 da aka shirya taron a NDA wato Kwalejin Horasda Hafsoshin Soja ta Nigeria dake Kaduna.

Ya ce taron zai ba masu ruwa da tsaki damar tattaunawa kai tsaye da rundunar soji domin nemo mafita mai ɗorewa ga rikicin manoma da makiyaya da ke addabar ƙasar.

Farfesa Vantsawa ya ƙara da cewa za a fitar da sanarwar ƙarshe (communiqué) domin gwamnati ta yi amfani da ita wajen tsara manufofi na magance matsalar.

Taken taron shi ne: “Haɗin Kan Soja da Fararen Hula Domin Ci Gaban Kiwon Dabbobi Mai Dorewa da Tsaron Ƙasa.”

Usman Sani