Isra’ila Ta Kashe Plasdinawa Fiye Da 35,000 A Gaza

Yau sama da watanni 7 da fara wannan yaki tsakanin Isra’ila da Hamas kenan, kuma magatakardan Majalisar Ɗinkin Duniya, Antonio Guterres ya  buƙaci a tsagaita wuta don samun sukunin aiwatar da ayyukan jinkai, sannan a saki waɗanda ake garkuwa da su ba tare da gindaya wasu sharruɗa ba.

A yayin da al’ummar yankin  Gaza ke ci gaba da kasancewa a cikin halin tagayyara, ƙoƙarin samar da yarjejeniyar tsagaita wuta da masu shiga tsakani daga Masar da Qatar ya nuna alamun naƙasu.

A ranar Asabar, shugaban Amurka, Joe Biden ya ce ko a ‘gobe’ ana iya cimma yarjejeniyar tsagaita wuta idan Hamas ta saki waɗanda ta ke garkuwa da su tun daga ranar 7 ga watan Oktoban shekarar da ta gabata da  ta kai hari Isra’ila.

A ranar Lahadi, Hamas ta bayyana kalaman Biden a matsayin koma -baya ga tattaunawar, sannan ta ce Fira ministan Isra’ila, Benjamin Netanyahu ya yi gaggawar yin watsi da tattaunawar ta wajen kaddamar da harin ƙasa a Rafah.

A jiya Lahadi, sakataren harkokin wajen Amurka, Antony Blinken  ya ce wannan harin da Isra’ila ta ƙaddamar ta ƙasa zai kawo tasgaro ga doka da oda ne kawai, amma ba zai kawar da Hamas ba.

Rahotanni sun ce luguden wutar da Isra’ila ta yi a cikin dare ya lalata yankuna da dama na Gaza.