Masu Bincike Sun Isa Zamfara Don Binciken Harin Kuskure Da Aka Kai Yankin Maradun

Wata babbar tawaga daga hedikwatar rundunar sojin sama ta Najeriya ta isa jihar Zamfara domin gudanar da tantancewar sakamakon harin da jirgin ya afku a jihar.

Tawagar ta samu jagorancin Air Vice Marshal (AVM) Edward Gabkwet, ta kuma kai ziyarar ban girma ga gwamna Dauda Lawal a gidan gwamnati tare da jajantawa gwamnatin jihar kan lamarin.

Air Vice Marshal Gabkwet wanda ya baiwa Gwamna Lawal tabbacin jajircewar rundunar wajen yaki da ‘yan fashi da kuma maido da zaman lafiya a jihar da ke fama da rikici, yana mai cewa, yaki da ta’addanci ya zama dole a yankin.

Ya kuma jaddada cewa, rundunar sojin saman Najeriya za ta ci gaba da jajircewa wajen gudanar da ayyukanta na kare rayuka da dukiyoyin jama’a, inda ya yi alkawarin gudanar da cikakken bincike kan lamarin.

Da yake zantawa da manema labarai bayan kammala taron, Gwamna Dauda Lawal ya yaba wa rundunar sojojin saman Najeriya bisa wannan ziyarar da suke yi da kuma kokarin da suke yi na tunkarar kalubalen tsaro da jihar Zamfara ke fuskanta.

Gwamna Lawal ya jaddada aniyar gwamnatin jihar na ci gaba da tallafawa hukumomin tsaro domin tabbatar da zaman lafiya da kwanciyar hankali.

Da yake zantawa da manema labarai bayan kammala taron, Gwamna Lawal ya jaddada aniyarsa na bayar da tallafin da ya dace ga jami’an tsaro.

Ya yi kira da a kara hada kai a tsakanin masu ruwa da tsaki a yaki da rashin tsaro.

Tawagar ta kuma ziyarci hedikwatar rundunar hadin gwiwa ta Operation Fansan Yamma daga bisani kuma ta zarce zuwa unguwar Tungar Kara domin tantancewa a nan gaba.

Hare-haren da rundunar sojojin saman Najeriya ta kai a makon jiya Asabar, ta afkawa ‘yan banga da mazauna unguwar Tungar Kara bisa kuskure, lamarin da ya yi sanadin mutuwar wasu mutane.

AMINU DALHATU/Wababe