Manoma 200 Sun Samu Tallafin Kayan Noma a Zamfara

Daga Ibrahim Idris Kauran Namoda

Manoma 200 daga ƙananan hukumomin Kaura Namoda da Birnin Magaji a Jihar Zamfara sun amfana da tallafin kayan noma da kuɗi daga Ɗan Majalisar Tarayya mai wakiltar mazabun biyu, Honarabul Dr. Aminu Sani Jaji.

Tallafin ya haɗa da injunan feshi, magungunan feshi, fartanya da kuma Naira dubu 50 ga kowane manomi.

Da yake jawabi a wajen rabon tallafin, Alhaji Nasiru Sani Jaji, wanda ya wakilci Hon. Dr. Aminu Sani Jaji, ya ce an samar da kayan ne domin inganta harkar noma da taimakawa wajen samar da abinci.

Ya yi kira ga manoman da suka amfana da tallafin da su yi amfani da kayan yadda ya dace domin cimma manufar da aka samar da su.

Wasu daga cikin manoman da suka amfana sun yaba wa Hon. Dr. Aminu Sani Jaji bisa kulawar da yake bai wa manoma da sauran al’umma.

Sun kuma roƙi Allah Ya saka masa da alheri tare da ci gaba da ba shi ikon tallafa wa al’umma.

Yusuf Zubairu