Kashi 80 Na Masu Ajiya A Bankunan Da Aka Rufe Sun Karɓi Kuɗinsu – NDIC

Hukumar Inshorar Ajiya ta Nijeriya (NDIC) ta bayyana cewa fiye da kashi 80 na masu ajiya a bankunan kasuwanci da aka rufe a Nijeriya sun karɓi kuɗaɗen inshorar da aka tanada musu.

Wani jami’i a Sashen Binciken Bankuna na NDIC, Zayyad Abubakar, ne ya bayyana hakan a yayin wani taron wayar da kai kan ayyuka da rawar da NDIC ke takawa. An shirya taron ne ga ɗaliban Makarantar ’Yan Mata ta Sakandare ta Gwamnati (GGSS) da ke Old Airport Road, Minna, Jihar Niger.

Zayyad Abubakar ya bayyana cewa dukkan kwastomomin da ke da cikakkun bayanai a tsarin banki, cikin kwanaki biyar bayan soke lasisin bankinsu, an biya su kuɗinsu kai tsaye ba tare da sun nemi hakan ta hanyar gabatar da ƙorafi ba. Sai dai ya ce waɗanda ba su da cikakkun bayanai a banki, kamar BVN da sauran muhimman sharuɗɗa, ba a iya biyan su ba.

Ya ƙara da cewa a bara NDIC ta karɓi kusan ƙorafe-ƙorafe 80, inda aka warware kimanin 50 daga ciki, aka kuma mayar wa waɗanda abin ya shafa kuɗinsu. Ya jaddada cewa ana miƙa duk wasu batutuwan satar kuɗi ga hukumomin tsaro, domin ba sa cikin ikon NDIC.

A cewarsa, fiye da kashi 80 na ɗaliban GGSS Minna suna da asusun banki sakamakon shirye-shiryen wayar da kan da NDIC ke yi kan juriyar kuɗi, samun kuɗin shiga don daidaito da ’yancin kai na kuɗi. Ya kuma ce sama da ɗalibai dubu biyu daga jihohi goma a dukkan yankunan ƙasar sun amfana da shirye-shiryen NDIC na wayar da kai kan shigar da jama’a harkar banki da ilimin kuɗi, wanda ke haifar da sakamako mai kyau.

A nasa jawbai kan Ranar Ajiya ta Duniya ta 2025, wani jami’i a Sashen Sadarwa da Hulɗa da Jama’a, Tanko Ibrahim, ya shawarci ɗaliban da su tsunduma cikin ƙananan sana’o’i domin dogaro da kai, tare da buɗe asusun banki don ajiya da zuba jari.

COV: Aliyu Lawal