Kano ta ƙaddamar da kwamitin OGP domin ƙarfafa gaskiya da riƙon amana

Gwamnatin Jihar Kano ta ƙaddamar da kwamitin jagoranci na Open Government Partnership (OGP) domin ƙarfafa gaskiya, riƙon amana da kuma inganta shugabanci mai haɗa kowa da kowa.

An ƙaddamar da kwamitin ne a ma’aikatar kula da saye da kwangiloli da bibiyar ayyuka, tare da halartar wakilai daga gwamnati, ƙungiyoyin farar hula da kuma kafafen yaɗa labarai.

Babban sakataren ma’aikatar, Injiniya Garba Adamu, ya yabawa gwamnan jihar bisa goyon bayan da ya bayar wajen kafa kwamitin, yana mai cewa OGP wata hanya ce da ke haɗa gwamnati da ƙungiyoyin farar hula domin inganta gaskiya da riƙon amana.

Kwamishinan ma’aikatar kuma mataimakin shugaban OGP na gwamnati, Nura Ma’aji, ya bayyana cewa wannan tsari na duniya ne da ke ƙarfafa shiga ta jama’a da haɗin kai a harkokin mulki.

Ya ƙara da cewa kwamitin ya ƙunshi mambobi 16, rabinsu daga gwamnati da rabinsu daga ƙungiyoyin farar hula, domin tabbatar da wakilci da haɗin kai.

A nasa jawabin, shugaban OGP daga ɓangaren ƙungiyoyin farar hula, Abdulrazak Alkali, ya yaba da ƙoƙarin gwamnatin Kano wajen aiwatar da shirye-shiryen da suka shafi yaƙi da cin hanci, samun bayanai, shari’a da kuma sauyin yanayi.

Gwamnatin ta kuma bayyana cewa tana da tsarin aiki na shekarun 2024 zuwa 2026, tare da buƙatar ƙara ƙaimi wajen aiwatar da shi domin inganta ayyukan gwamnati da hidima ga jama’a.

Khadijah Aliyu/Kano