Gwamnatin Jihar Kano Ta Dawo Da Ayyukan Ma’aikatar Yada Labarai

Kwamishinan Yada Labarai da Harkokin Cikin Gida na Jihar Kano, Kwamared Ibrahim Waiya, ya sanar da maido da kashi 85% na ayyukan da aka kwace daga ma’aikatar yada labarai.

Wannan yunkuri na da nufin farfado da ma’aikatar tare da inganta ayyukanta a jihar.

A cewar Waiya, maido da ayyuka wani muhimmin mataki ne na karfafa ma’aikatar da inganta ayyukanta.

Ya kara da cewa tuni ma’aikatar ta fara bullo da dabarun zamani domin bunkasa yada labarai a jihar Kano.

Wasu daga cikin tsare-tsaren da Waiya ta sanar sun hada da kafa dandalin ‘yan kasa na Kano, wanda zai samar da hanyar da ‘yan kasa za su ba da tasu gudummawar ci gaban jihar.

“Ma’aikatar za ta kuma shirya taron mu’amala a kowane wata uku tsakanin gwamnati da ‘yan kasa don magance matsalolinsu da burinsu”

Kwamishinan ya bayyana cewa, ma’aikatar za ta hada gwiwa da kungiyoyi masu zaman kansu (CBOs) a fadin kananan hukumomi 44 domin zama jakadun shugabanci na gari.

“CBOs za su yi aiki don tabbatar da cewa ‘yan ƙasa sun ci moriyar dimokuradiyya ta hanyar ayyukan ci gaba”

Waiya ya kuma bayyana abubuwan da gwamnatin jihar ta sa a gaba, da suka hada da bunkasa tattalin arziki, ilimi, da kuma maido da yara kanana.

Ya yi nuni da cewa gwamnati ta baiwa tattalin arziki fifiko ta hanyar samar da wutar lantarki mai zaman kanta domin gyara masana’antu tare da neman hadin gwiwa a bangaren wutar lantarki.

“Gwamnatin ta kuma kafa dokar ta-baci a fannin ilimi, inda ta samar da tufafin makaranta da littattafai kyauta ga dalibai”

“Bugu da kari kuma, gwamnatin jihar ta kafa wani babban kwamiti domin tabbatar da an dawo da yaran kan tituna gida”.

Rediyon Najeriya ya ruwaito cewa, maido da ayyukan ma’aikatar yada labarai ana sa ran zai karawa gwamnatin jihar damar tattaunawa da ‘yan kasar yadda ya kamata tare da magance matsalolinsu.

KHADIJAH ALIYU/Wababe