Cibiyar Kukah Ta Gabatar Da Tsare-Tsaren Karfafa Tsaron Al’umma

Cibiyar Kukah Centre for Faith, Leadership and Public Policy ta gabatar da shawarwari da za su taimaka wa gwamnatoci a matakin jiha da tarayya wajen kafa ingantaccen tsarin doka da zai jagoranci jami’an tsaron al’umma domin inganta aikin su.

A yayin wani taro na gabatar da sakamakon bincike kan yadda ake samun rarrabuwar kai a harkar tsaron al’umma, Manajan aikin cibiyar, Terseer Bamber, ya ce an gudanar da binciken ne domin ƙarfafa tsarin doka da hukumomi wajen tabbatar da kyakkyawan aiki a fannin tsaro.

Ya ce binciken ya samu goyon bayan shirin Strengthening Peace and Resilience in Nigeria (SPRiNG) tare da haɗin gwiwar UK International Development, Tetra Tech, da Cibiyar Nazarin Zaman Lafiya ta Jami’ar Usmanu Danfodiyo, Sakkwato.

Bamber ya ce bukatar wannan bincike ta taso ne sakamakon karuwar dogaro da ƙungiyoyin tsaron al’umma a Najeriya, musamman saboda matsalolin tsaro da rikice-rikicen kabilanci da addini a jihohi irin su Sokoto, Kaduna, Katsina, Benue da Plateau.

Ya nuna damuwa cewa wasu daga cikin waɗannan ƙungiyoyi ba su da tsayayyen tsarin aiki, lamarin da ke haifar da zargin cin zarafi da take haƙƙin ɗan Adam.

Shi ma shugaban tawagar binciken kuma shugaban Cibiyar Nazarin Zaman Lafiya ta Jami’ar Usmanu Danfodiyo, Farfesa Usman Abdulkadir, ya ce rahoton binciken mai shafuka 145 ya gano tushen da ya haddasa rarrabuwar kai a cikin tsarin tsaron al’umma.

Ya ce rahoton ya kuma bayar da shawarwari guda tara da za su taimaka wajen tsara yadda ake kafawa da gudanar da waɗannan ƙungiyoyi.

Farfesa Usman ya ce idan gwamnati ta amince da shawarwarin tare da kafa doka a kansu, hakan zai taimaka wajen hana siyasantar da tsaron al’umma musamman gabanin zaɓen shekarar 2027.

Taron ya samu halartar hukumomin gwamnati, shugabannin gargajiya, jami’an tsaro da sauran masu ruwa da tsaki.

Nasiru Muhamad/Sakkwato