An Kaddamar Da Dashen Itatuwa A Rukunin Gidaje Na Danmodi Da Ke Birnin Kudu

Shugaban Karamar Hukumar Birnin Kudu, Dr. Builder Muhammad Uba ya kaddamar da dashen itatuwa a rukunin sabbin gidaje na Danmodi dake a Jihar Jigawa.

A jawabin sa, Dr Builder Uba ya bukaci jama’ar yankin da su rungumi dashen itatuwa domin samun lada da kuma yaki da kwararowar hamada.

Shi ma a nasa jawabin, Shugaban sashen aikin gona, Malam Muktar Idris Gumel ya shawarci  kungiyoyi da su rika sa ido wajen kula da dashen itatuwa.

Wakilinmu ya shaida mana cewar, an dasa kimanin bishiyoyi 300,  yayin da za’a ci gaba da yin dashen a sauran wurare da ake bukatar hakan a fadin Karamar Hukumar ta Birnin Kudu.

Dashen itatuwan na daga cikin kudurorin shugaban karamar hukumar  na magance matsalar hamada da zaizayar kasa da kuma sauyin yanayi

Kazalika, anyi tanadin dashen itatuwa dubu 100 domin dasawa a bana kamar yadda Gwamna Umar Namadi ya tanadar.

Bikin ya samu halartar kungiyoyin matasa da dama.

Usman Mohammed Zaria