Ƙungiyar Jigawa FADAMA CARES Ta Taya Shugaban Hukumar Sauya Fasalin Noma Ta Jihar Murna

Ƙungiyar Jigawa FADAMA CARES ta taya murna ga Dr. Saifullahi Umar bisa nadin sa a matsayin Daraktan Janar na farko na Hukumar Sauya Fasalin Noma ta Jihar Jigawa (JATA).

Nadin Dr. Saifullahi Umar ya samu amincewar Gwamnan Jihar Jigawa, Malam Umar A. Namadi a kwanakin baya.

A cikin wata sanarwa da jami’in hulɗa da jama’a na FADAMA CARES, Ibrahim Ibrahim ya sanya wa hannu, ƙungiyar ta bayyana wannan naɗi a matsayin shaida ga jajircewa, ƙwarewa da gagarumar gudunmawar Dr. Umar a matsayinsa na mai ba da shawara kan harkokin noma ga Gwamna.

Sanarwar ta ƙara da nuna tabbacin cewa a ƙarƙashin jagorancinsa, JATA za ta jagoranci sauye-sauye masu ma’ana, ta ƙarfafa kirkire-kirkire, tare da sauya fannin noma a Jigawa bisa daidaito da shirin manufofi 12 na Gwamna Namadi.

Ƙungiyar Jigawa FADAMA CARES ta kuma yi addu’a ga Allah Ya kara  hikima da nasara ga Dr. Saifullahi Umar domin sauke wannan nauyi da aka dora masa.

Usman Mohammed Zaria