Najeriya Na Kara Samun Tagomashi Karkashin Mulkin Tinubu- Fadar Shugaban Kasa

Fadar Shugaban Ƙasa ta bayyana cewa gwamnatin Shugaba Bola Ahmed Tinubu ta samu ci gaba a fannoni daban-daban na tattalin arziƙi.

Sanarwar da mai ba Shugaban shawara kan harkokin yada labarai, Bayo Onanuga, ya fitar, ta ce ajiyar kuɗaɗen ƙasar na waje ya kai kusan Dala Biliyan 42 daga Dala Biliyan 32 da Tinubu ya tarar. Haka kuma gwamnati ta biya bashin sama da Dala Bliyan 7 ciki har da na kamfanonin jiragen sama.

Har ila yau, FFadar Shugaban Kasar ta musanta maganganun Atiku Abubakar na cewa yunwa da matsin tattalin arziƙi sun yi kamari, tana mai cewa kididdigar NBS ta nuna hauhawar farashi na raguwa tsawon watanni biyar, tare da samun ƙarin riba a harkokin kasuwanci.

Sanarwar ta ce gwamnati na ɗaukar matakan gyara kura-kuran baya, inda jihohi ke iya biyan albashi da fansho ba tare da jinkiri ba, kana kuma ana samun damar gudanar da ayyukan ci gaba.

Bayan shekaru biyu da watanni biyar kacal a ofis, gwamnatin yanzu ta bayyana alfahari da irin ci gaban da ake samu a ƙarƙashin jagorancin Shugaba Bola Ahmed Tinubu.

Daga Bello Wakili