Mutun Uku Sun Rasu A Wani Turmutsitsi A Gidan Gwamnatin Neja

Daga Aliyu Lawal, Minna

Mutane uku sun rasa rayukansu sakamakon turmutsitsi da ya auku a harabar Gidan Gwamnatin Jihar Neja da ke Minna.

Dubban mutane daga sassa daban-daban na jihar ne suka yi tururuwa zuwa Gidan Gwamnatin talatar nan domin nuna rashin goyon bayansu ga wani shirin zanga-zangar da ake zargin wasu matasa zasu gudanar dangane da mutuwar wasu ma’aikatan hakar ma’adinai talatin da bakwai da ke hannun hukuma.

Sai dai wasu majiyoyi sun bayyanawa Wakilinmu dake Minna cewa, mutane da dama sun je Gidan Gwamnatin ne domin karɓar tallafin kuɗi har naira dubu goma wanda Gwamnan Jihar Neja Mohammed Umar Bago ya bayar.

Yawancin mutanen da suka yi tururuwa zuwa wurin waɗanda suka haɗa da maza da mata da yara da matasa ciki har da wasu matan aure da ƙananan yara wurin ya kasa ɗaukar adadin mutanen wanda daga bisani ya haifar da turmutsitsi.

Rahotanni sun ce wasu daga cikin mutanen da suka samu raunuka na ci gaba da samun kulawar likitoci a wata cibiyar lafiya da ke Minna.

Duk ƙoƙarin da wakilinmu yayi na ji ta bakin Babban Sakataren Yaɗa Labaran Gwamnan Jihar Neja Bologi Ibrahim domin samun ƙarin bayani kan lamarin ya ci tura.

Fassara: Hauwa’u Muhammad Lawal