Karamar Hukumar Kiyawa Ta Raba Harami Da Kudade Ga Mahajjata

Majalisar karamar hukumar Kiyawa ta bada gudunmawar naira dubu dari bakwai ga maniyyatan aikin hajjin bana na yankin.

Shugaban karamar hukumar, Alhaji Nasiru Ahmad ya bayyana haka lokacin da yake jawabin ban kwana ga maniyyatan a sakatariyar karamar hukumar.

Ya ce kowane maniyyaci zai karbi naira dubu ashirin, haka kuma maniyyata maza za su karbi Harami, yayin da aka rabawa maniyyata mata turamen atamfa.

A don haka, ya bukaci maniyyatan yankin su zama jakadu nagari a lokacin da suke kasa mai tsarki.

A jawabansu daban daban jami’in shiyya na hukumar jin dadin alhazai, Abdullahi Abubakar Garba da mataimakin daraktan ma’aikata na karamar hukumar Kiyawa, Alhaji Rabiu Tela sun yabawa shugaban karamar hukumar bisa wannan tallafi da ya baiwa maniyyatan.

A jawabin ta na godiya a madadin maniyyata mata, Malama Maimuna Muhammad ta bada tabbacin maniyyatan za su ci gaba da yin addu’o’in neman dorewar zaman lafiya da karuwar arziki ga karamar hukumar Kiyawa da jihar Jigawa da ma kasa baki daya.

Usman Mohammed Zaria