Jihar Jigawa Za Ta Kafa Asusun Bada Agaji Ga Wadanda Ambaliyar Ruwa Ta Shafa

Gwamnatin Jihar Jigawa ta ce za ta kafa asusun bada agajin gaggawa na dindindin domin kula da Iftila’in  ambaliyar ruwa da ke faruwa a jihar.

Hakan na kunshe ne a cikin wata sanarwa da babban sakataren yada labaran gwamnan jihar  Hamisu Mohammed Gumel ya rabawa manema labarai a Dutse.

Ya ce gwamna Umar Namadi ya bayyana haka a lokacin da yake kaddamar da kwamitin kula da Iftila’in  ambaliyar ruwa a gidan gwamnati na Dutse.

A cewarsa, kwamitin wanda Architect Aminu Kani ke jagoranta, yana da alhakin kammala kafa asusun bada agajin gaggawa na ambaliya.

Hamisu Gumel ya ci gaba da bayanin cewa, an dora wa ‘yan kwamitin alhakin gudanar da ayyukansu cikin sauki da kuma tafiyar da asusun.

A jawabinsa yayin kaddamarwar, Gwamna Namadi ya bayyana jin dadinsa da irin ci gaban da aka samu kawo yanzu wajen magance matsalar ambaliyar ruwa a shekarar 2022.

Ya kuma jaddada muhimmancin daukar matakin gaggawa wajen magance matsalolin da ke kan gaba a cikin rahoton kwamitin da ya gabata.

Ya yaba da kokarin da tsohon kwamatin ya yi, wanda ya tattara sama da naira biliyan 1 da aka ware domin samar da tallafi ga sama da mutane dubu talatin da hudu da Iftila’in ya shafa.

“Manufar ita ce Asusun Tallafawa ya zama matakin gaggawa na farko don gyarawa da kuma bada  agaji ga wadanda iftila’in ya rutsa da su a kan tsari mai dorewa. Tuni tsohon kwamitin ya gabatar da wani daftarin kudirin doka amma yana bukatar a sake duba shi kafin a kammala shi domin daukar matakin da ya dace.” Inji shi.

Ya ce Gwamna Namadi ya bayyana kwarin gwiwa kan yadda mambobin kwamitin za su iya cika aikinsu a cikin wa’adin watanni biyu.

Ya kuma kara da cewa Gwamnan ya  ba su tabbacin tallafin kayan aiki da suka dace don saukaka gudanar da ayyukansu cikin sauki.

Usman Muhammad Zaria