Gwamnatin Neja Ta Jaddada Ƙudurinta Na Farfaɗo Da Kamfanin Buga Takardun Gwamnati

Daga Aliyu Lawal, Minna

Gwamnatin Jihar Neja ta tabbatar da shirinta na inganta ayyuka da ƙwarewar gudanarwa a Kamfanin Buga Takardun Gwamnati (Government Printing Press), domin cimma manufofin da aka kafa kamfanin a kansu.

Sakataren Gwamnatin Jihar Neja, Alhaji Abubakar Usman, ne ya bayar da wannan tabbacin yayin ziyarar aiki da ya kai kamfanin, wanda ke ƙarƙashin ofishinsa, domin duba ayyukan gyara da sabunta gine-ginensa da aka gudanar.

Yayin da yake jawabi ga ma’aikatan kamfanin, Alhaji Abubakar Usman ya buƙace su da su rungumi dabarun tallata ayyukan kamfanin ta hanyar jawo kwangilolin buga takardu daga hukumomin gwamnati da ƙungiyoyi masu zaman kansu da sauran waɗanda za su iya amfani da ayyukansa.

Sai dai ya ba da shawarar cewa ma’aikatan da suka samar da kwangilolin buga takardu daga wajen kamfanin su riƙa samun wani kaso na kuɗin da aka samu daga waɗannan ayyuka, a matsayin wani nau’in ƙarfafa musu gwiwa domin haɓaka ƙwazo, tabbatar da ɗorewar kamfanin da kuma zaburar da su wajen bayar da gudummawa ga ci gabansa.

Sakataren Gwamnatin ya jaddada cewa nasarar kamfanin za ta dogara ne musamman kan jajircewa, sadaukarwa da haɗin gwiwar ma’aikatansa, inda ya buƙace su da su nuna ƙwarewa da cikakken nauyin da ke kansu wajen gudanar da ayyukansu.

Tun da farko, Babban Sakataren Ma’aikatar Harkokin Siyasa, ESV James Bake, wanda kuma ke kula da Sashen Ayyuka na Musamman, ya bayyana cewa an samu damar gyara gine-ginen kamfanin ne sakamakon amincewar da aka bayar na amfani da kuɗaɗen da aka samu daga ayyukan buga takardu da aka gudanar wa hukumomin gwamnati.

Ya ƙara da cewa tun bayan fara kula da Sashen Ayyuka na Musamman, ya ƙaddamar da wasu matakai da nufin farfaɗo da kamfanin buga takardun gwamnati mallakar jihar, tare da dawo da ƙarfinsa wajen samar da ingantattun ayyukan buga takardu masu aminci da kuma gogayya da sauran kamfanoni.

Fassara: Shafii Abubakar Wababe