Gwamnatin Kano Ta Kafa Kwamitin Farfado Da Kasuwar Farm Centre Da Gobara Ta Lakume

Gwamnatin Jihar Kano ta kaddamar da wani kwamitin musamman domin bincike da kuma kula da abubuwan da suka biyo bayan gobarar da ta tashi a kasuwar wayoyin hannu da ke Farm Centre.

Sakataren Gwamnatin Jihar Kano, Alhaji Umar Farouk Ibrahim, ne ya gudanar da bikin kaddamarwar a madadin Gwamnan Jihar.

An dora wa kwamitin nauyin bincikar musabbabin gobarar, sanin girman asarar da aka yi da kuma bayar da shawarwari masu amfani don kauce wa kara faruwar irin wannan iftila’i.

Da yake jawabi a wurin kaddamarwar, Alhaji Umar Farouk ya jaddada muhimmancin samar da tallafi bisa gaskiyada adalci, tare da gargadin gujewa siyasantar da shirin tallafawa waɗanda abin ya shafa.

Ya bukaci mutane, kungiyoyi da dukkan ‘yan Najeriya masu kishin al’umma da ke son bayar da taimako ga ‘yan kasuwar da gobarar ta shafa, da su tura tallafinsu ta hannun kwamitin ko kuma ta asusun ajiyar gwamnati na musamman da aka ware domin hakan:

Sunan Asusun: FARM CENTRE GSM MARKET FIRE INCIDENCE SUPPORT FUNDS ACCOUNT
Lambar Asusun: 1310076187
Banki: ZENITH BANK

An nadaKwamishinan Harkokin Musamman, Alhaji Nasiru Sule Garo a matsayin shugaban kwamitin, yayin da sauran mambobin kwamitin suka fito daga  ma’aikatun gwamnati, hukumomin tsaro, ƙungiyoyin ‘yan kasuwa da kuma masu zaman kansu daga sashen kasuwanci.

Gwamnatin Jihar Kano ta jaddada kudirinta na tallafawa waɗanda abin ya shafa da kuma sake gina kasuwar ta hanya mafi tsari.

Gwamnati  ta bukaci haɗin kai daga dukkan masu ruwa da tsaki domin cimma wannan manufa.

Rel/Khadijah Aliyu