Farfesa Muhammed Khalid Othman Ya Zama Sabon Shugaban Jami’ar Tarayya Ta Dutsinma

Jami’ar Tarayya ta Dutsinma ta zabi Farfesa Muhammed Khalid Othman a matsayin sabon Shugaban Jami’ar na dindindin, tare da amincewar Majalisar Gudanarwar Jami’ar.

Da yake zantawa da manema labarai a Dutse, babban birnin jihar Jigawa, Magatakardar Jami’ar, Dokta Musa Ajiya, ya bayyana cewa mai kula da jami’ar (Pro-Chancellor), Ali Abubakar-Jatau, ne ya sanar da nadin.

A cewar Dokta Ajiya, Abubakar Jatau wanda shi ne Shugaban Majalisar Gudanarwa, ya bayyana hakan ne bayan taron na musamman karo na 36 da aka gudanar a daren Juma’a.

Ya ce Farfesa Othman ya fito ne a matsayin wanda ya fi kowa cancanta bayan wani tsari na tantancewa mai tsauri kuma bisa gaskiya, a cikin mutane 17  da suka nemi mukamin 17.

Ya ƙara da cewa an gudanar da tsarin tantancewa cikin gaskiya, inda aka mika sunayen ‘yan takara uku mafi cancanta don tantancewa da amincewar Majalisar Gudanarwa.

Rediyon Najeriya ya ruwaito cewa, Farfesa Othman ya fara aiki daga matsayin Mataimakin Malamin Jami’a har zuwa matsayin Farfesa, inda ya riƙe matsayi daban-daban a matsayin malami, mai bincike, da kuma mai gudanarwa.

Haka kuma, ya taɓa zama Darakta-Janar na Hukumar Nazarin Ingantaccen Aikin Noma ta NAERLS da ke Jami’ar Ahmadu Bello, Zariya.

Yanzu haka Farfesa Othman memba ne a Majalisar Gudanarwar Jami’ar, inda yake wakiltar Majalisar Dattawan Jami’ar.

Usman Muhammad Zaria