An Kaddamar Da Shirin Dashen Itatuwa A Gundumar Bakori

Gundumar Bakori ta jihar Katsina ta kaddamar da shirin dashen itatuwa domin rage zaizayar kasa a yankin.

A cikin wata sanarwa da shugaban kwamitin aikin gona, Cigarin Bakori Alhaji Shehu Ishiye ya fitar, ya bayyana cewa Hakimin Bakori, Makaman Katsina Alhaji Garba Tukur Idris, ya yi kira ga jama’a da su daina sare itatuwa ba bisa ka’ida ba don kare muhalli.

Ya jaddada bukatar wayar da kai kan muhimmancin dasa itatuwa wajen habaka tattalin arziki.

Alhaji Garba Tukur Idris ya ce gundumar za ta tabbatar da cewa an kula da itatuwan da aka dasa yadda ya kamata domin cimma burin kare muhalli.

Hakimin ya bayyana cewa taron ya kuma kunshi rabon kayan abinci da tabarmi ga wadanda hare-haren ‘yan bindiga suka shafa a gundumar.

Alhaji Garba Tukur Idris ya sake tabbatar da kudirin masu rike da sarautun gargajiya na gundumar wajen tallafawa marasa galihu a cikin al’umma, tare da samar da muhalli mai kyau domin ingantacciyar rayuwa.

Suleiman Sani Rigachikun