Karamar Hukumar Malam Madori Ta Bada Goron Sallah Na Naira Miliyan Biyu Ga Ma’aikata

Kungiyar Ma’aikatan Ƙananan Hukumomi ta Najeriya (NULGE), reshen Malam Madori, ta yaba da kokarin Shugaban Karamar Hukumar, Salisu Sani Garun-Gabas, bisa bayar da gudunmawar naira miliyan biyu domin ma’aikatan su samu damar yin bukukuwan Sallah ta cikin farin ciki.

Shugaban Kungiyar, Aminu Tafida, ne ya bayyana haka ga Jami’in Yada Labarai na Karamar Hukuma, Musa Muhammad Hadejia, jim kaɗan bayan an raba kuɗaɗen ga ma’aikata.

Aminu Tafida ya bayyana cewa wannan kyauta wani bangare ne na ƙoƙarin ƙarfafa gwiwar ma’aikata, domin kuwa hakan zai sa su kara samun azama wajen gudanar da ayyukansu yadda ya kamata.

A baya, Shugaban Karamar Hukumar, Salisu Sani Garun-Gabas, ya bukaci ma’aikatan karamar hukumar da su rike aikinsu bisa gaskiya da amana.

Usman Muhammad Zaria