Kwastam da Gwamnatin Kebbi Sun Kulla Haɗin Gwiwa kan Hanyar Safarar Kaya ta Nijar–Benin yayin da Gwamnatin Tarayya ta Buɗe Hanyoyin Kasuwanci

Hukumar Kwastam ta Nijeriya ta kulla haɗin gwiwa ta musamman da Gwamnatin Jihar Kebbi domin aiwatar da hanyar wucewar kaya da Shugaba Bola Ahmed Tinubu ya amince da ita, wadda za ta bai wa kayayyakin da ke tafiya zuwa Jamhuriyar Nijar damar wucewa ta cikin Jamhuriyar Benin.

Da yake jawabi yayin karɓar Shugaban Hukumar Kwastam ta Nijeriya, Bashir Adewale-Adeniyi, a ziyarar ban girma da ya kai jihar Kebbi, Gwamna Nasir Idris ya tabbatar da cewa jihar ta shirya tsaf domin yin aiki tare da Gwamnatin Tarayya don tabbatar da gudanar da ayyukan wannan hanya cikin sauƙi da inganci.

Gwamnan ya yaba da salon jagorancin Shugaban Kwastam, Adewale-Adeniyi, tare da nuna godiya ga tawagar Jamhuriyar Benin bisa haɗin kai da suka bayar.

Tun da farko, Shugaban Kwastam ya bayyana cewa wannan shiri zai magance cikas da ake fuskanta a harkar wucewar kaya, ya kare tsaron ƙasa, tare da tabbatar da cewa ana kammala fitar da kaya cikin awanni 48 ta hanyar amfani da sabbin fasahohi domin hana karkatar da kaya zuwa inda ba a nufa ba.

Ya yi gargaɗi cewa ’yan kasuwa da masu ruwa da tsaki da suka karya dokokin wucewar kaya za su fuskanci hukunci mai tsanani, yana mai jaddada cewa rashin bin ƙa’ida na iya haifar da shingayen kasuwanci ba na haraji ba tare da raunana amincewa tsakanin ƙasashe maƙwabta.

Shugaban Kwastam, wanda Gwamna Idris da tsofaffin gwamnoni biyu suka tarbe shi cikin girmamawa duk da sanar da ziyarar sa’o’i 24 kacal, ya yaba da ruhin ’yan’uwa da haɗin kai na al’ummar Jihar Kebbi, tare da nuna muhimmancin jihar a tsarin tsaron Nijeriya.

Ya ƙara da cewa kayayyakin da ke fitowa daga tashar jiragen ruwa ta Apapa da filayen jiragen sama na Nijeriya zuwa ƙasashen makwabta za a tantance su kuma a motsa su cikin awanni 48, ba tare da tauye tsaron ƙasa ko muradun tattalin arziƙi ba.

COV: SANI DUTSINMA