Kebbi Ta Samu Ci Gaba Kan Mata

Gwamnatin Jihar Kebbi ta ce ta samu gagarumin ci gaba wajen ƙarfafa mata da kare haƙƙin yara da tallafa wa marasa galihu.

Kwamishiniyar harkokin mata da ci gaban yara, Hajiya Halima Hassan Kamba, ta bayyana haka yayin taron manema labarai a Birnin Kebbi. Ta ce gwamnatin Gwamna Nasir Idris ta aiwatar da shirye-shiryen horas da mata da matasa sana’o’i domin dogaro da kai da rage talauci.

Hajiya Halima ta ƙara da cewa ma’aikatar ta samar da tallafi ga marayu ta hanyar ba su kuɗaɗe da kayan sana’a domin su fara ƙananan sana’o’i. Ta kuma yaba da gudunmawar matan gwamna wajen tallafa wa shirye-shiryen ƙarfafa mata da matasa a jihar.

Sani Haruna/Kebbi