Kamfanin Sarrafa Makamai Na Kasa Yasha Alwashin Tamakawa Wajen Dashen Itatuwa

Darakta-Janar na Hukumar Kula da Masana’antu na Tsaro ta Najeriya-DICON, Manjo Janar Babatunde Alaya ya ba da shawarar a yi kokarin hadin gwiwa wajen inganta muhalli mai tsafta don jin dadin rayuwar al’umma baki daya.

Ya yi wannan kiran ne a wani taron dashen itatuwa da kungiyar Chemical Society of Nigeria-CSN ta shirya, wanda aka gudanar a masana’antar DICON ordnance da ke Kakuri a jihar Kaduna.

Manjo Janar Babatunde Alaya ya bayyana cewa dashen itatuwa yana da matukar muhimmanci ga lafiyar dan Adam, domin yana tsarkake iskar da muke shaka.

Ya yi nuni da cewa, nan da wasu shekaru masu zuwa, tsiron zai zama inuwa ga mutane da dabbobi, wanda a karshe zai tabbatar da zaman lafiyar al’umma baki daya.

Manjo Janar Alaya, wanda ya bayyana shirin DICON na tallafawa wajen fadakar da jama’a muhimancin dashen itace, ya bayyana shirin a matsayin wanda ya dace.

Ya kuma yaba wa CSN bisa zabar DICON a matakin farko na gudnaarda wannan aikin.

Tun da farko a nata jawabin, shugabar hukumar ta CSN ta jihar Kaduna, Emi-Johnson Umoeka ta bayyana cewa an yi tunanin gudanar da wannan gangamin ne domin yin tasiri ga al’umma ta hanyar shuga bishiyu domin magance saran gandun daji, da kuma yaki da gurbacewar iska, kasa da ruwa.

Ta bayyana cewa kungiyar na hada kai da Gwamnatin Jiha tare da zabo Makarantun da za su dasa itatuwa da dama da suka hada da hanyoyin mota.

Babban abin da ya fi daukar hankali a taron shi ne babban daraktan hukumar da daraktocin DICON da kuma mambobin CSN na dashen itatuwan.

Usman Sani.