Gwamnatin Zamfara Ta Nuna Damuwa Kan Ƙaruwar Hare-Haren ’Yan Bindiga

Daga AMINU DALHATU

Gwamnatin Jihar Zamfara ta bayyana matuƙar damuwarta kan ƙaruwar hare-haren ’yan bindiga a wasu sassan jihar a baya-bayan nan, tare da tabbatar wa mazauna jihar cewa tana ƙoƙarin dawo da zaman lafiya da tsaro mai ɗorewa.

Kwamishinan Yaɗa Labarai da Al’adu na jihar, Mahmud Mohammed Dantawasa, ne ya bayyana hakan yayin wani taron manema labarai kan halin tsaro na baya-bayan nan da aka gudanar a Gidan Gwamnatin jihar da ke Gusau, inda ya yi bayani kan matakan da gwamnati ke ɗauka domin yaƙi da ayyukan ’yan bindiga da kuma ƙarfafa kariyar rayuka da dukiyoyin al’umma.

Dantawasa ya ce an shirya taron ne domin amsa tambayoyin al’umma kan hare-haren, bayar da bayanai kan matakan tsaron da ake ci gaba da aiwatarwa, tare da sake jaddada aniyar gwamnati na kawo ƙarshen matsalar rashin tsaro da ta daɗe tana addabar jihar.

Ya bayyana cewa garuruwan Bindin da Falale da ke Ƙaramar Hukumar Maru, Damba da Wanke a Ƙaramar Hukumar Gusau, Bagega a Ƙaramar Hukumar Anka, da Moriki a Ƙaramar Hukumar Zurmi na daga cikin al’ummomin da hare-haren baya-bayan nan suka shafa.

Kwamishinan ya lura cewa hare-haren sun ƙara jefa mazauna yankunan cikin fargaba, tare da kawo cikas ga muhimman harkokin tattalin arziki da zamantakewa, ciki har da noma, kasuwanci da sufuri.

Mahmud Dantawasa ya yi Allah-wadai da hare-haren da ake kai wa al’umma da fararen hula, yana mai bayyana irin waɗannan ayyukan laifuka a matsayin abin da ba za a amince da shi ba, kuma barazana ga zaman lafiya, haɗin kai da ci gaban jihar.

Ya tabbatar wa al’umma cewa gwamnati tana aiki tare da hukumomin tsaro da abin ya shafa domin ƙarfafa matakan mayar da martani ga sabbin barazanar tsaro da inganta kariyar al’ummomin da suka fi fuskantar haɗari.

Fassara: Shafii Abubakar Wababe