Kwamitin Warware Turka-Turkar Dangote Da NNPCL Ya Fara Aiki

Majalisar wakilai ta kaddamar da wani kwamitin hadin gwiwa na bangaren man fetur na gudanar da bincike kan kalubalen da ake fuskanta a fannin da kuma zargin samarwa da shigo da kayayyaki marasa inganci da gurbatattun danyen man fetur a cikin gida.

Mataimakin kakakin majalisar, Benjamin Kalu wanda ya bayyana haka, ya bukaci mambobin kwamitin da su gudanar da aikinsu cikin tsanaki ba tare da tsoro ko nuna son rai ba.

Ya jaddada cewa manufar ita ce samar da mafita mai ɗorewa kan zargin shigo da man da ba shi da inganci.

Da yake zantawa da manema labarai jim kadan bayan taron mamba mai wakiltar karamar hukumar Birnin Kano kuma mamba a kwamitin hadin gwiwa Sagir Ibrahim Koki ya bayyana cewa bayan kaddamar da kwamitin kwamitin ya tattauna sosai kan batutuwa da dama tare da amincewa da rubuta wasikun gayyata ga dukkan masu ruwa da tsaki. da Hukumomin Gwamnati da abin ya shafa

Sagir Ibrahim ya ci gaba da bayyana cewa a yanzu kwamitin zai duba batutuwa talatin amma mafi muhimmanci daga cikinsu akwai zargin da ake yi tsakanin matatar man Dangote da hukumar kula da albarkatun man fetur, da batun shigo da gurbatattun danyen man fetur da kuma batun rashin wadata matatun mai na na cikin gida da danye mai.

Dan majalisar ya ci gaba da cewa, kwamitin ya kuduri aniyar gayyatar duk masu ruwa da tsaki a harkar man fetur musamman wadanda abin ya shafa don gudun kada a ce ba a ba wa wani damar kare kansa ba, yana mai tabbatar da cewa duk wadanda abin ya shafa dole ne su gurfana a gaban kwamitin don magance matsalar.

Bashir M/Wababe